“Pocapan ingkang Barokah”

            Assalamu’alaikum wr.wb.

            Alhamdulillahirobbil’alamin.

Para Bapa, para Ibu, saha sedaya jamaah pengaosan ingkang dipun mulyaaken dening Allah. Langkung rumiyin mangga kita tansah ngraos syukur dhumateng ngarsanipun Gusti Allah ingkang tansah paring rahmat, hidayah, saha nikmat dhateng kita sami saengga kita saget ngrawuhi pengaosan punika. Sholawat saha salam mugi tansah katetepna dhumateng junjungan kita Nabi Agung Muhammad Saw, kluarganipun, para sahabat, lan para sedherekipun, kalebet kita sedaya punika ngantos dumugi akhire jaman, aamiin.

Jamaah pengaosan ingkang dipun rahmati Allah. Ing wekdal punika kula badhe ngaturaken bab “Pocapan ingkang Barokah”. Kita sedaya mangertos bilih salah satunggalipun nikmat Allah dhateng kawulanipun inggih punika nikmat lisan. Lisan punika sanajan alit wujudipun, nanging ageng tumusipun tumrap sae lan awosipun manungsa. Kanthi lisan tiyang saget nglairaken punapa ingkang dipun kajengaken, kanthi lisan tiyang saget sami sesambetan, weling-wineling kesalahn. Ananging, kedah dipun emut bilih jalaran saking lisan ugi saget muwuhaken bebaya lan kacilakan ingkang ageng.

Awisan-awisan ing Islam kadosta tembung ingkang muspra, wicara dora, palsu, nyebar gossip, nyatur ala, adu-adu, lan sanesipun. Tiyang ingkang wicara sae, manfaat, badhe manggih pituwas kesaenan. Dene tiyang ingkang wicara awon, kufur, goroh, fitnah, temtu kemawon ugi badhe manggih pituwas awon, kalebet dosa ingkang njalari dukanipun Allah.

Rosulullah Saw ngendika miturut hadits riwayat Ahmad, “Ora bakal lempeng imane sawenehing wong saengga lempeng atine, lan ora bakal lempeng atine saengga lempeng lisane. Lan sawenehing wong ora lumebu suwarga menawa tangane ora ngrasa tentrem saka alane lisane.”

Paedahipun pocapan ingkang sae, antawisipun:

1.      Nuwuhaken kasaenan, lan tiyang ingkang ngucapaken pikantuk ampunan.

2.      Wicara ingkang sae langkung utami katimbang sedhekah ingkang dipun kantheni pocapan awon.

Allah paring dhawuh ing Surah Al-Baqoroh ayat 263 ingkang artosipun, “Tetembungan kang becik lan ngemu pangapura, luwih becik katimbang sedhekah kang dikantheni sabarang kang gawe lara atine kang nampa. Allah Maha Sugih lan Maha Nyukupi.”

3.      Wicara ingkang sae kangge sarono mlebet suwarga.

4.      Wicara ingkang sae ndhatengaken ridhaning Allah.

5.      Wicara ingkang sae mujudaken pratandha tiyang muslim.

Jamaah ingkang minulya. Mekaten ingkang saget kula aturaken. Mugi-mugi wonten manfaatipun lan mugi-mugi Allah tansah paring ridha dening sedaya amal ibadah kita, aamiin.

Wassalamu’alaikum wr.wb.

#SESORAH